Hiki ni kipindi cha hatari sana, wanawake wengi wanapigania haki sawa. Harakati za wanawake zimeenea kama moto wa nyika, wakidai kwamba mbali na suala la wanawake kuzaa, hakuna tofauti yao na wanaume. Ni chungu cha moto katika ndoa ambazo mwanamke na mwanaume wote wanataka kuwa viongozi. Kuna methali inasema mafahari wawili hawawezi kuishi zizi moja. Hii ndio sababu ndoa nyingi za leo zinapita katika moto. Wanaume wengi wanakabiliwa na changamoto ya kuwa na wanawake wanaowazidi vyeo au kipato, au vyote kwa pamoja. Na kwa kweli kadiri wanawake wengi wanavyozidi kuongeza viwango vya elimu, kuongezeka kiuchumi na kupanda vyeo ndivyo wanavyoongeza shauku ya kuwatawala waume zao. Ni ukweli usiopingika, mwanaume anahitaji ujasiri na ufahamu wa ziada ili kuishi bila matatizo yoyote na mwanamke wa jinsi hiyo.

Mapambano ya fursa sawa kwa wanaume na wanawake yameenea kila kona ya dunia. Inawezekana jambo hili likawa jema kwa wanawake ambao wasingependa kukandamizwa au hata kuongozwa pasipo kukandamizwa. Na kwa upande wa pili, pengine jambo hili linaweza kuhesabiwa kama laana au mzigo kwa wanaume ambao wasingependa kuona wanawake wakifanikiwa zaidi yao na kufurahia uhuru wa ‘kuwa mwanadamu’ kama alivo mwanaume. Vyovyote itakavyokuwa, matokeo hasi au chanya yatatokana na mtazamo alionao mwanaume juu ya mwanamke. Kwa mfano, wanaume wengi huanza kujihami pale wanapohisi mwanamke anakuwa juu. Hebu tafakari kauli zifuatazo; “Hivi unajua kuwa mimi ndio baba wa familia?” “Au unanidharau kwa sababu una pesa nyingi? / Umesoma?” Mwanaume anapohisi kupoteza nafasi yake kama kiongozi kwa sababu yoyote ile, huo ndio wakati ambao amani ya nyumba huanza kutoweka. Ataacha kumpenda mke wake, ataacha kumsikiliza, ataathirika kisaikolojia na mwisho utakuwa mbaya kwa familia nzima.