Bwana asifiwe!! Unaweza kusoma SEHEMU YA 1, SEHEMU YA 2, SEHEMU YA 3, au SEHEMU YA 5 ya somo hili, au unaweza kuendelea kusoma sehemu hii ya 4 uliyopo.

Kila taasisi ina mwanzo wake na kusudi la kuanzishwa kwake. Ndoa ni moja ya taasisi nyeti sana ambayo ina mwanzo na kusudi la kuanzishwa kwake. Nani alianzisha ndoa, na ni kwa kusudi gani. Katika somo hili nitazungumzia tu kuhusu kuanzishwa kwa taasisi hii nyeti kamo moja ya msingi wa kiinani katika mahusiano ya uchumba hadi ndoa. Kumbuka kisichokuwa na chanzo au mwanzo madhuti na w auhakika haiwezi kudumu na kuwa na matokeo chanya. Kadhalika na ndoa isiyokuwa na mwanzo wake.

MISINGI YA KIIMANI KATIKA MAHUSIANO YA UCHUMBA HADI NDOA

4. Ndoa ni taasisi ambayo mwanzilishi wake ni Mungu mwenyewe. Haiwezi kutimiza kusudi la kuwepo kwake nje ya Mungu aliyeianzisha.
Mwanzo 1:26 - 27; 2:18, 21 - 25; Mathayo 19:4; Marko 10:6

Mwanzo 1:26-27

Mwanzo 2:18,21-25

Mathayo 19:4-6

Marko 10:6-9

Vifungu vya maandiko hapo juu vinatuthibitishia kwa wazi kabisa kuwa mwanzilishi wa ndoa ni Mungu mwenyewe. Yeye ndiye aliyeiumba na akaiundia na mfumo ambao kwa huo itafanya kazi vizuri, yaani Neno la Mungu (Biblia). Kwa hiyo, ili ndoa iwe ya ki-Mungu wanandoa hawana budi kufuata sheria, kanuni na maelekezo ya Mungu kuhusiana na ndoa, yaani mafundisho ya Biblia.

Mithali 5:1,11-13

Kama kuna kitu ambacho wengi hawapendi siku za leo (hususani wanaume) kuhusiana na ndoa ni mafundisho ya ndoa. Wengi wao wanadhani wanajua yote na kwa sababu hiyo hawahitaji mafundisho. Hii siyo kweli, unahitaji mafundisho kufanya vizuri kwenye ndoa yako kwa wewe mwanaume kama mume kwa mkeo na kwa wewe mwanamke kama mke kwa mumeo. Swala la kujifunza ni endelevu, halina kikomo. Na chanzo cha mafundisho yako yote kiwe ni chanzo cha ndoa yako, yaani Mungu kupitia neno lake (Biblia). Mungu anaona umuhimu wa wewe kujifunza ili ufanye vizuri, ndiyo sababu anasema katika Zaburi;

Zaburi 32:8

Hakuanzisha ndoa tu kisha akuache uangaike nayo, hapana, yupo kukufundisha, kukuonyesha njia utakayoiendea, kukushauri kupitia neno lake (na Roho wake ndani yako na kupitia watumishi wake au waamini wengine) huku jicho lake likikutazama kwa karibu kuhakikisha kila kitu kinakuwa sawa. Ni ajabu na ya kupendeza namna gani. Tunachopaswa kufanya ni kukubali na kutii.

Isaya 1:19-20

MAMBO YA KUEPUKA ILI KUTUNZA MISINGI YA IMANI WAKATI WA NA BAADA YA KUANZISHA MAHUSIANO YA UCHUMBA HADI NDOA.

1. Epuka kuanzisha mahusiano bila kumuhusisha Mungu. Hakikisha hatua zako zimo mikononi mwake na zinaongozwa na yeye katika jambo hili. Kama kuna jambo hatari kabisa katika mahusiano ya uchumba hadi ndoa ni kuanzisha mahusiano bila kumshirikisha Mungu, hii ni hatari sana. Wapo watu ambao wao huanzisha mahusiano bila ya kumshirikisha Mungu, kisha baada ya kuanza humwomba Mungu amariki mahusiano hayo. Hii si sawa, acha Mungu awe chanzo na mwanzo kwa wewe kumshirikisha.

Yakobo 1:17

Mke au mume ni kipawa kitolewacho ambacho mtu hupewa na kukipokea. Kipawa kitolewacho kilicho kamili mtu hupewa na Baba Mungu, hapewi na akili yake mwenyewe, elimu yake, ujuzi wake, rafiki zake, ndugu zake, mama yake wala baba yake.

Mithali 19:14

Kwa kweli Mungu anatutaka sisi tumshirikishe kila neno kabla hatujafanya maamuzi, kwa sababu sisi wenyewe bila yeye hatuwezi kufanya neno lo lote (Yohana 15:5) na likatuletea matokeo mazuri. Ili tuwe na matokeo mazuri ni lazima tumshirikishe yeye kwa kila neno kabla ya kuchukua hatua yo yote ile. Mlango uko wazi, ametoa wito wa kusemezana naye wakati wo wote, hakuna kizuizi.

Isaya 1:18; Isaya 43:26

Kwa hiyo, epuka kabisa kuanzisha mahusiano ya uchumba hadi ndoa pasipo kumshirikisha Mungu. Iwapo unakumbwa na changamoto ya kushindwa kupambanua mawazo au sauti ya Mungu ndani yako kuhusiana na hili, ninashauri kuwa, tafuta mtu anayeaminika aliyekomaa kiroho ili akusaidie kukushauri. Huyu anaweza kuwa ni kiongozi kanisani, mzee wa kanisa, mwinjiristi, mwalimu, mchungaji au mwamini mwenzako. Lakini hakikisha mtu huyo anakuwa ameoa au kuolewa tayari. Hata hivyo mimi nashauri kuwa umshirikishe mchungaji wako, hii ni njema zaidi.

Wagalatia 6:6

2. Epuka kuanzisha mahusiano nje ya kanuni za Biblia. Biblia imekataza kuoa au kuolewa na kafiri (mtu asiye amini), ngono kabla au nje ya ndoa, mahusiano na mtu wa jinsi moja na wewe na maonyesho ya ngono kabla ya ndoa. Kutunza misingi hii ni muhimu sana ili wewe na ndoa yenu muwe salama. Ni muhimu na lazima kufuatisha vile Biblia inatufundisha la sivyo tutaharibikiwa tu.

Yoshua 1:7-8

Kufanikiwa kwako katika ndoa yako kunategemea sana namna unavyotunza misingi ya Neno la Mungu. Hakuna akili na hekima ya namna ya kufanya mambo na kuendesha maisha yetu isipokuwa neno la Mungu ndani yetu. Hilo ndilo akili yetu na hekima yetu.

Kumbukumbu 4:5-6

3. Epuka kuendesha mahusiano yako ya uchumba hadi ndoa bila maongozi ya Mungu. Muhusishe Mungu na ukubali maongozi yake kupitia neno lake, Roho Mtakatifu na watumishi wake. Usiwe mtu unayejiongoza wewe wakati Mungu ametia rasilimali nzuri za kukusaidia kuendesha mahusiano yako. Ni swala tu la wewe kukubali na kutii.

4. Epuka kuendesha mahusiano yako kinyume cha neno la Mungu. Neno la Mungu ndilo ramani yetu; linatuonyesha wapi pa kukanyaga na kwa namna gani. Kukiuka neno la Mungu ni kujiweka matatani.

Zaburi 119:105,112

Mithali 6:23

Nini hutokea mtu anapotembea gizani pasipo kuwa na taa inayompa mwanga na nuru? Bila shaka hujikwaa akaumia na wakati mwingine huangamia kabisa. Kwa hiyo, mtu anapoendesha mahusiano yake ya uchumba hadi ndoa kwa kulifuata neno la Mungu, mtu huyo hutembea katika njia ya uzima na pia hutembea nuruni na si gizani. Kwa hiyo, yupo salama yeye na mahusiano yake. Tatizo letu wengi hatudumu katika kuliishi neno, na kwa hiyo hujikuta matatani.

NINI KINATOKEA MUNGU ANAPOKUWA SI MWANZILISHI WA MAHUSIANO YAKO.

1. Mungu hajishughulishi na wala hajihusishi na ndoa yako. Hii ni kwa sababu maisha yako yanakuwa si ya utii kwa neno la Mungu. Huwezi kufanikiwa kwa kukiuka neno la Mungu. Na kwa kuwa Mungu hatenganishi na neno lake, badala ya kukuwezesha atakupinga, na badala ya kuwa pamoja nawe atajitenga mbali nawe.

1 Petro 5:5

Yakobo 4:6

Warumi 1:18

2. Kusudi la Mungu la kuanzisha ndoa linakuwa hatiani kutimilika katika ndoa hiyo. Kama upo nje ya Mungu mwanzilishi wa ndoa, ajuaye kusudi la kuanzisha ndoa, na mwenye neema inayowezesha ndoa kufanya kazi katika kutimiliza kusudi, kusudi hilo la ndoa litatimiaje? Bila shaka haliwezi kutimia.

Ayubu 12:16

Tunakuwa na nguvu za kutimiliza makusudi hususani ya ndoa kwa kubaki kwake katika mpango wake. Tofauti na hivyo hakuna kusudi tutakalofanikisha.

3. Shetani anakuwa na uwezo na nguvu dhidi ya ndoa yenu. Kama Mungu hayupo upande wenu kuwapa raha, basi Shetani atakuwa juu yenu kusababisha uchungu na taabu.

Zaburi 78:10,59,61

4. Kanisa linakosa usemi juu ya ndoa yenu; kwa hiyo baraka za kanisa na madhabahu ya kanisa hilo kupitia mchungaji wake zinakuwa kinyume cha ndoa yenu. Kanisa ndiyo mamlaka ya juu kabisa duniani hapa ya kuwawajibisha wanandoa wanapokiuka na kuhaini agano la ndoa na neno la Mungu.

Mathayo 18:15-17

Wahusika wanapoanzisha mahusiano nje ya Mungu (hasa wanapokuwa wameikana na kuiacha imani yao ya kwanza) kanisa hukosa usemi juu yao kwa sababu hata hivyo jambo hili la kuoa na kuolewa ni la hiari sana. Na tukiangalia sheria za nchi hazimfungi mtu kiimani au kidini katika hili. Yupo huru kuchagua. Lakini katika Biblia tumefungwa maadamu tu tupo ndani ya imani. Pale mtu anapohaini imani na neno la Kristo kanisa hukosa nguvu. Katika hatua hii watu hawa hukosa baraka ya kanisa tendo linaloweza kupelekea Shetani kupitisha laana na mambo yake yote; yeye haji ila aibe, achinje, na kuharibu. Ni muhimu na ni lazima pia kuwa waangalifu na makini sana la sivyo tutapotelea katika maumivu na masumbufu mengi.

Tutaendelea katika somo linalofuata. Mungu akubariki sana.